అమ్మను వదిలించుకున్నారు

అచేతనంగా పడి ఉన్న వృద్ధురాలు

వేములవాడ, న్యూస్‌టుడే: నవ మాసాలు మోసి కని పెంచిన తల్లిని వదిలించుకున్నారు. వృద్ధాప్యంలో ఆలనా పాలన చూసుకోవాల్సిన వారు ఓ చెట్టు కింద వదిలేసి మానవత్వాన్ని మంట గలిపారు. అచేతనంగా ఉండి చీకట్లో మగ్గుతూ, ఎండకు ఎండుతూ, వానకు తడుస్తూ దిక్కులు చూస్తున్న ఆ వృద్ధురాలిని చూసిన వారి గుండెలు కలిచివేస్తున్నాయి. వివరాల్లోకి వెళితే... వేములవాడ మున్సిపల్‌ పరిధిలో నందికమాన్‌ ప్రాంతంలోని ఓ చెట్టు వద్ద దాదాపు 80 ఏళ్లు పైబడిన ఓ వృద్ధురాలిని  నాలుగు రోజుల క్రితం వదిలి వెళ్లారు. అచేతనంగా ఉన్న ఆమెను చూసిన పక్కనున్న ఇటుకల తయారీ కార్మికులు రొట్టెలు, నీళ్లు, అరటి పండ్లు అందజేశారు. ఎక్కడి నుంచి వచ్చింది, ఎవరు వదిలి వెళ్లారనే విషయాన్ని ఆమె స్పష్టంగా చెప్పలేకపోతుంది. ఓ సారి నాంపల్లి గ్రామమని, మరోసారి తిమ్మాపూర్‌, ఇంకోసారి నర్సింగాపూర్‌ గ్రామమని, తన పేరు బూదవ్వ అంటూ పొంతన లేని మాటలు చెప్పడంతో చిరునామా తెలుసుకోవడం కష్టంగా మారింది. తనకు ముగ్గురు కూతుళ్లు ఉన్నారని తెలిపింది. ఈ విషయం తెలుసుకొన్న పట్టణ సీఐ కరుణాకర్‌ గురువారం రాత్రి ఆమె వద్దకు వెళ్లి వివరాలు ఆరా తీశారు. సఖి కేంద్రం అధికారులు ఆమెను వృద్ధుల సంరక్షణ కేంద్రానికి తరలించారని, సరైన వివరాలు చెప్పడం లేదని సీఐ తెలిపారు.