వర్షాలకు పడిపోయిన పాఠశాల గదులు

పడిపోయిన గదులను పరిశీలిస్తున్న అధికారులు

కంప్లి, న్యూస్‌టుడే: ఇటీవల కురిసిన అధిక వర్షాలకు తాలూకాలోని హళె నెల్లుడి ప్రభుత్వ ప్రాథమిక పాఠశాల ఐదు గదులు దెబ్బతిన్నాయి. కంప్లి తహసీల్దార్‌ గౌసియా బేగం, కురుగోడు విద్యాశాఖ అధికారి వెంకటేశ్‌ రామచంద్రరావు శనివారం గ్రామానికి వచ్చి పాఠశాలను పరిశీలించారు. గ్రామ పంచాయతీ మాజీ అధ్యక్షుడు కరి బసవనగౌడ మాట్లాడుతూ విద్యార్థులు ఇబ్బంది పడే అవకాశం ఉన్నందున వెంటనే నూతన గదులు, అంగన్‌వాడీ కేంద్రానికి ప్రత్యేక భవనం నిర్మించాలని అధికారులను కోరారు. తహసీల్దార్‌ మాట్లాడుతూ గదుల నిర్మాణం కోసం ఉన్నతాధికారుల దృష్టికి తీసుకెళ్లాం. అంగన్‌వాడీ కేంద్రాన్ని తాత్కాలికంగా సముదాయ భవనంలో కొనసాగిస్తామని తెలిపారు. ఉప తహసీల్దార్‌ రవీంద్రకుమార్‌ తదితరులు పాల్గొన్నారు.