ఇంజినీరింగ్‌ రుసుములు తగ్గించాలి

జిల్లా పాలనాధికారి కార్యాలయం వద్ద ఆందోళన చేస్తున్న విద్యార్థులు

బళ్లారి, న్యూస్‌టుడే: పెంచిన ప్రథమ సంవత్సరం ఇంజినీరింగ్‌ రుసుములను తగ్గించాలని కోరుతూ ఏఐడీఎస్‌వో సంఘం శనివారం జిల్లా పాలనాధికారి కార్యాలయం వద్ద ఆందోళన చేపట్టింది. సంఘం ప్రతినిధులు ఈరణ్ణ, సౌమ్య, రవికిరణ్‌, శాంతి, నింగరాజ్‌, అనుపమా, స్నేహ, స్ఫూర్తి, కార్తీన్‌, మోహన్‌, సంజన తదితరులు స్థానిక గడిగి చెన్నప్ప కూడలి నుంచి డీసీ కార్యాలయం వరకు ప్రదర్శనగా వెళ్లి అధికారికి వినతిపత్రం అందజేసి ముఖ్యమంత్రికి పంపాలని కోరారు. రెండేళ్లుగా కొవిడ్‌ మహమ్మారితో తీవ్ర ఆర్థిక ఇబ్బందులు పడుతున్న తరుణంలో ప్రభుత్వం ప్రవేశ రుసుములు రూ.10 వేలు పెంచడం తగదన్నారు. అకాల వర్షాలకు పంటలు పూర్తిగా దెబ్బతిని రైతుల ఆదాయమార్గం మూసుకుపోయిందన్నారు. నూటికి 80 శాతం మంది రైతుల పిల్లలే ఉండటం వల్ల పెంచిన రుసుములు తగ్గించి విద్యార్థులకు ఉపశమనం కలిగించాలని కోరారు.