Suicide: భర్తతో వేరుపడి.. ప్రియుడితో జీవించాలనుకొని..

రామనగర, న్యూస్‌టుడే : ఆమె గర్భిణి. కుటుంబ కలహాల కారణంగా భర్తతో వేరుపడి పుట్టింటికి చేరింది. అక్కడ ఓ వ్యక్తి పరిచయం కావడంతో కలిసి జీవించాలని ఇద్దరూ నిర్ణయించారు. అందులో భాగంగా ఆదివారం ఒక ప్రాంతంలో కలుసుకోవాలని నిర్ణయించారు. అప్పటికే ఆమె ఓ నిర్ణయానికి వచ్చినట్లుంది. ప్రియుడు రాగానే ముందుగా నిర్ణయించిన ప్రకారం ఉరివేసుకుని ఆత్మహత్య చేసుకుంది. ప్రియురాలి మరణాన్ని జీర్ణించుకోలేక అతడూ ఆత్మహత్య చేసుకున్నాడు. ఈ ఘటన రామనగర జిల్లా మాగడి సమీపంలో ఆదివారం చోటుచేసుకున్నట్లు పోలీసులు సోమవారం తెలిపారు. మృతులను బ్యాలకెరె నివాసి మోహన్‌ (24), దాసేగౌడనపాళ్యకు చెందిన పుష్పలత (24)గా గుర్తించారు. పుష్పలతకు గతంలో వివాహమై ఓ కొడుకు కూడా ఉన్నాడు. ప్రస్తుతం ఆమె గర్భణి బ్యాలహళ్లికి చెందిన మోహన్‌కూ వివాహమైంది. వారం కిందటే పుష్పలత భర్తతో ఘర్షణపడి బ్యాలకెరెకు వచ్చింది. ఆ సమయంలోనే ఇద్దరికీ పరిచయమై ప్రేమకు దారితీసింది. సహజీవనం చేయాలని నిర్ణయించారు. భర్తతో వేరుపడిన తనకు త్వరలోనే ప్రసవమైతే పుట్టే బిడ్డ తన తండ్రి ఎవరని అడిగితే ఏమని సమాధానమివ్వాలనే అంశమై ఆమె అంతర్మథనానికి గురైందని పోలీసులు అంచనాకు వచ్చారు. ఈ నేపథ్యంలోనే ఉరివేసుకుని ఆత్మహత్య చేసుకుందని చెబుతున్నారు. ఆమె మరణంతో చలించిన మోహన్‌ కూడా ఆత్మహత్య చేసుకున్నాడు. రామనగర గ్రామీణ పోలీసులు కేసు నమోదు చేసుకున్నారు.