పెళ్లికినిరాకరించాడని యువకుడి ఇల్లు, ఆటోను తగులబెట్టించిన యువతి!

యువకుడి ఇంట దగ్ధమైన ఆటో

బీదర్‌, న్యూస్‌టుడే : సాధారణంగా యువకులు తనను వివాహం చేసుకునేందుకు నిరాకరించిన యువతులపై పగబడతారు. బీదర్‌ జిల్లాలో అందుకు పూర్తిగా వ్యతిరేకంగా ఓ సంఘటన చోటుచేసుకుంది. జిల్లాలోని బసవకల్యాణ తాలూకా బాగ్‌ హిప్పరగా గ్రామంలో భీమరావు అనే వ్యక్తికి చెందిన ఆటో, నివాసం అగ్నికి ఆహూతి అయ్యాయి. వివరాల్లోకెళ్తే.. చికనాగాంవ్‌కు చెందిన భీమరావు అనే వ్యక్తి కొంతకాలం కిందట సస్తాపూర్‌ గ్రామం సమీపంలో కుటుంబంతో కలిసి ఉండేవారు. ఆ సమయంలోనే సుమా అనే యువతితో పరిచయం అయింది. తనను వివాహం చేసుకోవాలని సుమా బలవంతం చేస్తూవచ్చిందట. ఆమె ఒత్తిళ్లకు తట్టుకోలేక భీమరావు తన తల్లిని తీసుకుని బాగ్‌ హిప్పరగా గ్రామంలో స్థిరపడ్డారు. తనను వివాహం చేసుకోని పక్షంలో తాను చేబదులుగా ఇచ్చిన రూ.4 లక్షలను తిరిగి ఇచ్చేయాల్సిందిగా ఆమె డిమాండు చేసింది. అయినప్పటికీ ఫలితం లేకపోవడంతో తనను నిరాకరించాడనే కోపంతో సుమా మనుషులను పురమాయించి భీమరావు ఇంటిని, ఆటోను తగులబెట్టించిందని కేసు నమోదైంది. ముడబి పోలీసులు దర్యాప్తు చేస్తున్నారు.