అధ్యక్ష పదవి రేసులో ఇద్దరు అతివలు

సుంకమ్మ

హొసపేటె, న్యూస్‌టుడే: హొసపేటె నగరసభ అధ్యక్ష, ఉపాధ్యక్ష పదవులకు రిజర్వేషన్లు ప్రకటించారు. 2020 అక్టోబరులో ప్రభుత్వం ప్రకటించిన రిజర్వేషన్ల ఆధారంగా ఈ నెల 21న అధ్యక్ష, ఉపాధ్యక్ష పదవులకు ఎన్నికలు నిర్వహిస్తారు. అధ్యక్ష పదవిని దళిత మహిళ, ఉపాధ్యక్ష స్థానాన్ని సాధారణ(జనరల్‌) వర్గాలకు కేటాయించారు. మొత్తం 35 మంది సభ్యుల్లో స్వతంత్రులను కలుపుకొని 20 మంది సభ్యుల బలం ఉన్న భారతీయ జనతా పార్టీకే ఈ పదవులు దక్కడం లాంఛనమే. భాజపా నుంచి 4వ వార్డులో గెలిచిన సుంకమ్మ, 23వ వార్డు నుంచి విజయం సాధించిన గంగమ్మ అధ్యక్ష పదవికి అర్హులు. మంత్రి ఆనంద్‌సింగ్‌ అనుగ్రహం మేరకు వీరిద్దరిలో ఒకరు అధ్యక్ష పదవి చేపడతారని ప్రచారం జరుగుతోంది. ఈ పదవి కోసం ఆనంద్‌సింగ్‌ ఇంటి చుట్టూ వీరు తిరుగుతున్నారు. స్వతంత్రుల మద్దతుతో నగరసభలో అధికారం చేపట్టిన భాజపా, ఆ రుణం తీర్చుకునేందుకు 9మంది స్వతంత్రుల్లో ఒకరికి ఉపాధ్యక్ష పదవి కట్టబెట్టే అవకాశం కనిపిస్తోంది. ఇది కూడా మంత్రి నిర్ణయంపైనే ఆధారపడి ఉంది.

21న ఎన్నికలు: నగరసభ అధ్యక్ష, ఉపాధ్యక్ష పదవులకు ఈ నెల 21న ఎన్నికలు నిర్వహిస్తున్నట్లు ఉపవిభాగం అధికారి సిద్ధరామేశ్వర తెలిపారు. ఉదయం 11 నుంచి మధ్యాహ్నం ఒంటిగంట వరకూ నామపత్రాల సమర్పణ, 1.30 గంటలకు పరిశీలన, 2 గంటలకు ఉపసంహరణ, అవసరమైతే 2.10 గంటలకు ఎన్నికలు జరుగుతాయని పేర్కొన్నారు.

గంగమ్మ