హంపీలోని పాఠశాల ఆవరణలో సూర్యనమస్కార భంగిమలో సాధకులు

హొసపేటె, న్యూస్‌టుడే: కేంద్ర ప్రభుత్వ ఆయుష్‌ శాఖ ఆధ్వర్యంలో దేశవ్యాప్తంగా చేపట్టిన కోటి సూర్య నమస్కార శిబిరం హంపీలో ఆదివారం ప్రారంభమైంది. రంజు ఆర్ట్స్‌ యోగా ట్రస్టు వారు ఈ శిబిరాన్ని ఏర్పాటు చేశారు. యోగా ఉపాధ్యాయురాలు బి.పి.రంజాన్‌బీ అభ్యాసకులకు సూర్య నమస్కార యోగాభ్యాసం చేయిస్తున్నారు. రోజూ కనీసం గంటసేపు యోగా, ప్రాణాయామ చేస్తే ఆరోగ్యం సిద్ధిస్తుందని రంజాన్‌ బీ తేల్చి చెప్పారు. పిల్లలకు ఇప్పటి నుంచే యోగాభ్యాసం చేయిస్తే చదువులోనూ ముందుంటారని స్పష్టం చేశారు. అన్ని యోగాసనాలకు తల్లిలాంటి సూర్య నమస్కారాన్ని రోజుకి కనీసం 20 సార్లు చేయాలని సూచించారు. కార్యక్రమంలో ట్రస్టు గౌరవాధ్యక్షుడు మోహన్‌ చిక్కభట్‌ జోషి, ప్రధాన కార్యదర్శి వి.విరుపాక్షి, ఫక్రుద్దీన్‌ పాల్గొన్నారు.