వైరస్‌ తీవ్రమైతే మరిన్ని కఠిన చర్యలు

బెంగళూరు(యశ్వంతపుర), న్యూస్‌టుడే: కరోనా వైరస్‌ తీవ్రమై ఆసుపత్రుల్లో చేరే వారి సంఖ్య పెరిగితే మరిన్ని కఠిన చర్యలు తీసుకుంటామని రాష్ట్ర వైద్య ఆరోగ్యశాఖ మంత్రి డాక్టర్‌ కె.సుధాకర్‌ స్పష్టంచేశారు. శనివారం ఆయన విలేకర్లతో మాట్లాడుతూ ప్రస్తుతం కరోనా సోకినవారు ఆసుపత్రుల్లో తక్కువ సంఖ్యలో చేరుతున్నారని పేర్కొన్నారు. నెలాఖరు, ఫిబ్రవరి రెండో వారంలో వైరస్‌ మరింత వ్యాప్తి చెందుతుందని నిపుణులు వెల్లడించిన విషయాన్ని గుర్తు చేశారు. ప్రజలు ఇళ్ల నుంచి బయటకు రావద్దని, మాస్కు ధరించాలని సూచించారు. ప్రజలకు ఇబ్బంది కలిగించే విధంగా లాక్‌డౌన్‌, కర్ఫ్యూలు విధించబోమన్నారు. కరోనా నియంత్రించేందుకు అన్ని చర్యలు తీసుకున్నామని, ఆసుపత్రుల్లో పడకలు, ఐసీయూ, ఆక్సిజన్‌ సిలిండర్లను సిద్ధం చేసినట్లు చెప్పారు. ప్రతి వ్యక్తికి కరోనా పరీక్ష అవసరంలేదని ఐసీఎంఆర్‌ రాష్ట్ర ప్రభుత్వానికి సూచించినట్లు తెలిపారు.