‘మా పెళ్లికి రావద్దు’.. ఉన్న చోటు నుంచే ఆశీర్వదించండంటూ అభ్యర్థన

చామరాజనగర, న్యూస్‌టుడే: ‘బంధుమిత్ర సపరివారంగా తప్పకుండా పెళ్లికి రావాల’ని ఆహ్వానించడం చూస్తుంటాం. అయితే కర్ణాటకలోని చామరాజనగర జిల్లాలో ఓ యువ జంట ‘‘తమ పెళ్లికి దయచేసి రావద్దు. ఉన్న చోటు నుంచే ఆశీర్వదించండి’’ అంటూ సామాజిక మాధ్యమాల ద్వారా బంధువులు, స్నేహితులు, ఇతర ఆత్మీయులను అభ్యర్థించారు. ఇక్కడికి సమీపంలోని వి.సి.హోసూరు గ్రామస్థురాలు సుష్మా, చెన్నప్పనపురకు చెందిన శ్రేయస్‌ల వివాహం శని, ఆదివారాల్లో నిర్ణయించారు. ఇప్పటికే దాదాపు మూడు వేల మందికి వివాహ ఆహ్వానపత్రికల్ని అందించారు. కరోనా ప్రబలడంతో అట్టహాసంగా పెళ్లి చేసుకుంటే వైరస్‌ మరింత విజృంభించే ప్రమాదం ఉంటుందని భావించి తమ పెళ్లికి ఎవ్వరూ రావద్దంటూ బహిరంగంగా విజ్ఞప్తి చేస్తూ, అభ్యర్థన పత్రాన్ని కూడా పంపారు. వధువు సుష్మా మీడియా ద్వారా విజ్ఞప్తి చేస్తూ ‘‘మీ ఆరోగ్యమే మాకు ముఖ్యం. అందుకే పెళ్లికి రాకుండా ఇళ్లలో నుంచే ఆశీర్వదించాల’’ని వేడుకున్నారు. వధూవరుల కుటుంబ సభ్యులు మాత్రమే పెళ్లికి హాజరయ్యేలా చర్యలు తీసుకున్నారు.