మహిళా విశ్వవిద్యాలయం విస్తరణకు చర్యలు

బెంగళూరు (శివాజీనగర), న్యూస్‌టుడే : ఉత్తర కర్ణాటక అభివృద్ధికి అనుగుణంగా ఆ ప్రాంతంలోని యువతులు ఉన్నత విద్యను అభ్యసించేందుకు ప్రారంభించిన విజయపుర మహిళా విశ్వ విద్యాలయాన్ని మూసివేసే ప్రశ్నే లేదని జలవనరుల మంత్రి గోవింద కారజోళ తెలిపారు. వర్సిటీని మూసివేస్తారంటూ జరుగుతున్న ప్రచారాన్ని ఖండించారు. విధానసౌధలో సోమవారం నిర్వహించిన సమావేశంలో ఆయన విలేకరులతో మాట్లాడారు. ఈ విశ్వవిద్యాలయంలో అన్ని జిల్లాల యువతులూ చదువుకునేందుకు అవకాశం ఉందని తెలిపారు. మూసివేస్తారంటూ వస్తున్న వదంతులను విశ్వసించవలసిన అవసరం లేదన్నారు.

విజయపురలోని అక్కమహాదేవి మహిళా విశ్వవిద్యాలయాన్ని విస్తరించేందుకు చర్యలు తీసుకుంటున్నామని ఉన్నత విద్యా మంత్రి డాక్టర్‌ అశ్వత్థ నారాయణ వెల్లడించారు. ఆ ప్రాంగణంలోని సంస్కృత విశ్వ విద్యాలయం కొత్త ప్రాంగణంలోకి మారుతుందని తెలిపారు. విధానసౌధలో ఆయన విలేకరులతో మాట్లాడారు. సమకాలీన ప్రపంచంలో మహిళా సమస్యలను సమగ్రంగా అధ్యయనం చేసేందుకు వర్సిటీ సేవలను మరింత విస్తరించేందుకు చర్యలు తీసుకుంటామన్నారు.