జస్టిస్‌ శెట్టి పదవీవిరమణ

విలేకరుల సమావేశంలో జస్టిస్‌ విశ్వనాథశెట్టి

బెంగళూరు (మల్లేశ్వరం), న్యూస్‌టుడే : రాష్ట్ర లోకాయుక్త న్యాయమూర్తి జస్టిస్‌ విశ్వనాథశెట్టి సోమవారం తన పదవీవిరమణను ప్రకటించారు. ఆయన పదవీ కాలం ఈ నెల 27 వరకు ఉంది. కొత్త న్యాయమూర్తిని ప్రభుత్వం ఎంపిక చేసుకునేందుకు అనువుగా తాను పదవీ విరమణను ప్రకటించానని చెప్పారు. తన కార్యాలయంలో నిర్వహించిన సమావేశంలో ఆయన విలేకరులతో మాట్లాడారు. ఒత్తిడికి తలొగ్గకుండా, తన పరిధికి వచ్చిన కేసులన్నింటినీ వేగంగా పరిష్కరించేందుకు చర్యలు తీసుకున్నామని చెప్పారు. అవినీతి నియంత్రణ దళం (అనిద) ఏర్పాటు చేసిన తర్వాత లోకాయుక్తపై భారం తగ్గిందన్నారు. ప్రతి జిల్లాలో చెరువుల కబ్జా కేసుల దర్యాప్తు చురుకుగా కొనసాగుతోందని తెలిపారు. లోకాయుక్తకు పరిమిత అధికారాలు ఉండడంతో పలు కేసులను నేరుగా దర్యాప్తు చేసేందుకు అవకాశం లేకుండా పోయిందన్నారు.