ప్రజలకు ఆరోగ్యరక్ష

బెంగళూరు (సదాశివనగర), న్యూస్‌టుడే : ఆరోగ్య సూచికలో కర్ణాటకను ముందంజలో ఉంచేందుకు చర్యలు తీసుకుంటున్నామని ఆరోగ్య మంత్రి డాక్టర్‌ సుధాకర్‌ పేర్కొన్నారు. ఆరు జిల్లాల్లో పౌష్ఠికాహార సమస్యలు తీవ్రంగా ఉన్నాయని గుర్తించి, పరిష్కరించేందుకు చర్యలు తీసుకుంటున్నామని వివరించారు. ఆయన బుధవారం ఇక్కడ విలేకరులతో మాట్లాడారు. వచ్చే ఏడాది నాటికి నీతి ఆయోగ ఆరోగ్య జాబితాలో టాప్‌- 3 స్థానంలో ఉండడమే తక్షణ లక్ష్యమని తెలిపారు. బెంగళూరులో కొవిడ్‌ కేసులు గణనీయంగా తగ్గుముఖం పడుతుండగా, మైసూరు, హాసన, దక్షిణ కన్నడ తదితర జిల్లాల్లో నిదానంగా పెరుగుతున్నాయని తెలిపారు. ఒమిక్రాన్‌ కేసులు ఉన్నప్పటికీ ఆసుపత్రులలో చేరుతున్న వారి సంఖ్య తక్కువేనన్నారు. కఠిన నియమావళిని అనుసరిస్తే మరో రెండు వారాల్లో కేసులు తగ్గుతాయని ధీమా వ్యక్తం చేశారు. బెంగళూరు గ్రామీణ జిల్లాకు కొత్త జిల్లా ఆసుపత్రి నిర్మాణానికి ముఖ్యమంత్రితో చర్చించి, నిర్ణయాన్ని తీసుకుంటామని ప్రకటించారు. చిక్కబళ్లాపుర జిల్లా వ్యవహారాల బాధ్యతలు తప్పడంతో స్థానిక కార్యకర్తలు నిరాశకు గురయ్యారని తెలిపారు. పార్టీ తీసుకునే నిర్ణయాలకు నాయకులు అందరూ కట్టుబడడం తప్పనిసరి అన్నారు.