నందిహళ్లిలో శాంతి సభ

దాడికి గురైన కుటుంబాలను పరామర్శిస్తున్న అధికారులు

కారటగి, న్యూస్‌టుడే: తాలూకాలోని నందిహళ్లిలో శనివారం రాత్రి దళితులపై దాడి జరిగిన విషయమై జిల్లా పాలనాధికారి నేతృత్వంలో వివిధ శాఖల అధికారులు సోమవారం గ్రామాన్ని సందర్శించారు. దాడికి గురైన కుటుంబాలను పరామర్శించారు. ఇలాంటి ఘటనలు పునరావృతం కాకుండా చర్యలు తీసుకుంటామని బాధితులకు ధైర్యం చెప్పారు. అనంతరం జరిగిన శాంతి సభలో జిల్లా పాలనాధికారి వికాస్‌ కిశోర్‌ మాట్లాడుతూ చిన్న ఘటన గ్రామంలో శాంతికి భంగం కలిగించడం విచారకరం. దాడి జరిగిన విషయమై పోలీసు శాఖ వద్ద పూర్తి సమాచారం ఉంది. బాధ్యులపై చట్టరీత్యా చర్యలు తీసుకుంటాం. శాంతిని కాపాడేందుకు గ్రామంలో ఇరువర్గాలతో మరోసారి సమావేశం ఏర్పాటు చేస్తామన్నారు. బాధితులకు నిత్యావసర సరకులు పంపిణీ చేయాలని అధికారులకు సూచించారు. దళిత యువతకు రుణ సదుపాయం కల్పిస్తామన్నారు. ఎస్పీ అరుణాంశగిరి, జడ్పీ సీఈవో ఫౌజియా తరుణ్ణమ్‌, డీవైఎస్పీ రుద్రేశ్‌ ఉజ్జనికొప్ప, తహసీల్దార్‌ రవి అంగడి, వివిధ శాఖల అధికారులు పాల్గొన్నారు.