విద్యా సంస్థలపై ఐటీ దాడులు

బెంగళూరులోని ఓ విద్యాలయంలో ఐటీ అధికారుల వాహనాలు

బెంగళూరు (మల్లేశ్వరం), న్యూస్‌టుడే : ఆదాయానికి తగిన రీతిలో పన్ను చెల్లించలేదన్న అనుమానంతో బెంగళూరు నగరంలోని కొన్ని విద్యా సంస్థలపై ఆదాయ పన్ను శాఖ అధికారులు గురువారం దాడులు నిర్వహించారు. బాగలూరు పరిధిలోని దివ్యశ్రీ గ్రూపు, రేవా యూనివర్సిటీ, హుణసెమారనహళ్లి పరిధిలోని కృష్ణదేవరాయ ఇన్‌స్టిట్యూట్లకు చెందిన కార్యాలయాలు, సంస్థల ప్రతినిధులకు చెందిన నివాసాలపై దాడి చేసి సోదాలు నిర్వహించారు. కర్ణాటక-గోవా విభాగానికి చెందిన 250 మంది అధికారులు, సిబ్బంది 70 కార్లలో వచ్చి 45 చోట్ల దాడులు చేశారు. విదేశీ విద్యార్థుల నుంచి ఎక్కువ రుసుములు తీసుకుని, దాన్ని లెక్కల్లో చూపలేదన్న ఆరోపణలు రావడంతో దాడులు నిర్వహించారని సమాచారం. ఈ సంస్థలకు ఆంధ్రప్రదేశ్‌లో ఉన్న శాఖలపైనా అధికారులు దాడి చేశారని సమాచారం. పలు దస్త్రాలను అధికారులు జప్తు చేసుకున్నారు. దీనికి సంబంధించిన వివరాలను ఐటీ శాఖ అధికారికంగా ఇంకా వెల్లడించలేదు.