వర్సిటీ ప్రాంగణంలో భల్లూకం ప్రత్యక్షం

హొసపేటె, న్యూస్‌టుడే: హంపీ కన్నడ వర్సిటీ ఆవరణలో గురువారం భల్లూకం ప్రత్యక్షమైంది. హెలిప్యాడ్‌ వద్ద ఉదయం భల్లూకం సంచరిస్తుండగా దూరంనుంచి కొందరు విద్యార్థులు నాజూకు చరవాణిలో దృశ్యాలను బంధించారు. మొన్ననే వర్సిటీ ఆవరణలో ఓ చిరుత ప్రత్యక్షమై విద్యార్థుల్లో ఆందోళన కలిగించడం తెలిసిందే. ఇప్పుడు తాజాగా భల్లూకం కనిపించడంతో విద్యార్థులు భయాందోళన చెందుతున్నారు. పాపినాయకన హళ్లి, బైలువద్దిగెరె, గాదిగనూరు ప్రాంతాల నుంచి వర్సిటీకి వచ్చే విద్యార్థులు ‘బి’ గేట్‌ గుండా హెలిప్యాడ్‌ మార్గం నుంచే వర్సిటీ చేరుకుంటారు. ఆ ప్రాంతంలో భల్లూకం కనిపించడంతో అటు నుంచి వచ్చే విద్యార్థులు తీవ్ర భయాందోళన వ్యక్తం చేస్తున్నారు. వర్సిటీ పక్కనే దరోజి భల్లూకాల సంరక్షణ కేంద్రం ఉంది. అయినప్పటికీ ఎలుగులు వర్సిటీ ప్రాంగణంలో సంచరించడం చర్చనీయాంశంగా మారింది. భల్లూకాన్ని వెంటనే బంధించాలని వర్సిటీ వర్గాలు, విద్యార్థులు అటవీశాఖ అధికారులను కోరారు.