కిడ్నాపర్ల ఆటకట్టు

అభిజిత్‌

మైసూరు, న్యూస్‌టుడే : అపహరణకు గురైన అబిజిత్‌ (12) అనే బాలుడు కొన్ని గంటల్లోనే సురక్షితంగా తల్లిదండ్రులను చేరిన సంఘటన గురువారం మైసూరు కువెంపు నగరలో చోటుచేసుకుంది. కె.ఆర్‌.అసుపత్రిలో వైద్యులుగా ఉన్న దంపతుల తనయుడు అభిజిత్‌ గురువారం ఆడుకునే సమయంలో కారులో వచ్చిన దుండగులు అపహరించారు. ఈ విషయాన్ని వెంటనే బాలుడి తల్లిదండ్రులు పోలీసులకు ఫిర్యాదు చేశారు. రంగంలోకి దిగిన పోలీసులు నగరం నుంచి బయటకు వెళ్లకుండా అన్ని మార్గాల్లో కాపలాను ఏర్పాటు చేసి గాలింపును ముమ్మరం చేశారు. తప్పించుకునేందుకు మరో మార్గంకానరాక బాలుడిని గురువారం రాత్రి వదిలిపెట్టారని తెలిసింది. అపహరించినవారు తనకు బిస్కెట్లు, చాకొలెట్లు ఇచ్చేందుకు వచ్చినా తాను నిరాకరించినట్లు అభిజిత్‌ తెలిపారు. నగరంలోనే తనను కారులో బంధించి ఉంచారని.. చివరికి వదిలేశారని వివరించాడు.