ప్రభుత్వ గోశాల ప్రారంభం

తొలి గోశాలను ప్రారంభించి ఆవుకు మేత తినిపిస్తున్న మంత్రి ప్రభు చౌహాన్‌

చిక్కమగళూరు, న్యూస్‌టుడే : రాష్ట్రంలో ప్రభుత్వ తొలి గోశాల జిల్లాలోని కడూరు తాలూకా ఎమ్మెదొడ్డి గ్రామంలో సోమవారం ఆరంభమైంది. రాష్ట్ర పశుసంవర్ధకశాఖ మంత్రి ప్రభు చౌహాన్‌ దీన్ని ప్రారంభించారు. జిల్లాకు ఓ గోశాల పథకంలో భాగంగా దీన్ని ఏర్పాటు చేసినట్లు చెప్పారు. దాదాపు 11 ఎకరాల విస్తీర్ణంలో ఏర్పాటైంది. దీని నిర్మాణ, నిర్వహణకు రూ.53.50 లక్షలను వ్యయం చేశారు. ఈ గోశాలలో 150 గోవులు ఉండటానికి సదుపాయాలున్నాయి. ప్రతి 20 గోవులకు ఒక కాపరిని నియమించారు. గోవుల దత్తత కార్యక్రమాన్ని వచ్చే నెలలో ప్రారంభించనున్నట్లు మంత్రి వెల్లడించారు. ఒక్కో గోవును ఏడాది పాటు దత్తత తీసుకునేందుకు రూ.11 వేలను చెల్లించాలి. పుణ్యకోటి పథకం పేరుతో దత్తత కార్యక్రమాన్ని కొనసాగిస్తారు. ప్రతి జిల్లాలో కూడా గోశాలల్ని ఏర్పాటు చేయడం ద్వారా అక్రమంగా కబేళాలకు తరలించడాన్ని నివారించవచ్చని అన్నారు.