బిడ్డలను హతమార్చి.. తల్లి ఆత్మహత్య

మైసూరు, న్యూస్‌టుడే : భర్త మరొక మహిళతో సన్నిహితంగా ఉండడాన్ని ఆమె సహించలేకపోయింది. అన్నీ ఆమెకే దోచిపెడతాడని ఆందోళన చెందింది. అలాంటి పరిస్థితుల్లో తన పిల్లలు అనాథలుగా బతకడం కంటే తనతో పాటు మృత్యువాత పడితేనే మేలనుకుందేమో.. కూతుళ్లిద్దరినీ ఉరివేసి హతమార్చింది. అనంతరం ఆమె కూడా ఉరి వేసుకుంది. ఈ ఘటన మైసూరు జిల్లా టి.నరసీపుర తాలూకా రామేగౌడనపురలో చోటుచేసుకున్నట్లు మంగళవారం ఇక్కడ పోలీసులు తెలిపారు. మృతులను సరోజా (32), గీతా (6), కుసుమ (4)గా గుర్తించారు. తాలూకాలోని మావినహళహళ్లికి చెందిన నింగరాజు అనే వ్యక్తితో సరోజకు వివాహమైంది. ఇటీవల మరొక మహిళతో భర్త సన్నిహితంగా ఉండడాన్ని సహించలేక ఇద్దరూ తరచూ గొడవపడేవారు. పరిస్థితి తీవ్రరూపం దాల్చడంతో ఆమె తన పిల్లలతో కలిసి పుట్టింటికి చేరుకుంది. సోమవారం రాత్రి ఇంట్లో ఎవరూ లేని సమయంలో ముందుగా పిల్లలిద్దరికీ ఉరి వేసింది. అనంతరం తానూ ఉరివేసుకుని ఆత్మహత్య చేసుకున్నట్లు అధికారులు తెలిపారు. టి.నరసీపుర పోలీసులు కేసు నమోదు చేసుకున్నారు.