కాషాయ దండు నిరసన జెండా

కన్నయ్యలాల్‌ హత్యను ఖండిస్తూ టౌన్‌హాల్‌ వద్ద ధర్నాలో హిందూ జాగరణ సమితి కార్యకర్తలు

బెంగళూరు (శివాజీనగర), న్యూస్‌టుడే : ఉదయపూర్‌లో దుండగుల చేతిలో శిరచ్ఛేధానికి గురైన కన్నయ్య లాల్‌ అనే దర్జీకి మద్దతుగా బెంగళూరులోని వివిధ కన్నడ సంఘాలు ధర్నాకు దిగాయి. వీహెచ్‌పీ, హిందూ జాగరణ సమితి ప్రతినిధులు టౌన్‌హాల్‌తో భాజపా ఎమ్మెల్యేలు ఉన్న నియోజకవర్గాల్లో ధర్నా, నిరసన ప్రదర్శనలు నిర్వహించారు. టౌన్‌హాల్‌ వరకు భాజపా కార్యకర్తలు ప్రదర్శన నిర్వహించారు. ధర్నా చేస్తున్న సమయంలో జోరుగా కురిసిన వర్షాన్నీ ఆందోళనకారులు లెక్క పెట్టలేదు. అవాంఛనీయ ఘటనలకు తావివ్వకుండా ఆందోళనకారులు ఉన్న చోటే పోలీసులు విధులు నిర్వహించారు. ఘర్షణలకు అవకాశం ఉన్నచోట్ల భద్రతను కట్టుదిట్టం చేశారు. వదంతులను విశ్వసించవద్దని పోలీసులు విజ్ఞప్తి చేశారు. అవసరానికి అనుగుణంగా శాంతిసభలను నిర్వహించాలని పోలీసుల అధికారులు నిర్ణయించారు.