బెంగళూరు జిల్లాధికారి మంజునాథ్‌ అరెస్టు

బెంగళూరు (మల్లేశ్వరం), న్యూస్‌టుడే : కర్ణాటక రాజధాని బెంగళూరు శివారు ఆనేకల్‌ సమీపంలోని కూడ్లు గ్రామంలో 38 గుంటల భూవ్యవహారాన్ని పరిష్కరించేందుకు రూ.15 లక్షల లంచం డిమాండ్‌ చేసి- బయానాగా ఉప తహసీల్దారు మహేశ్‌ ద్వారా రూ.5 లక్షలు తీసుకున్న ఆరోపణలు ఎదుర్కొంటున్న బెంగళూరు నగర జిల్లాధికారి (కలెక్టర్‌) జె.మంజునాథ్‌ను అవినీతి నియంత్రణ దళం (అనిద) అధికారులు అరెస్టు చేశారు. చేతన్‌ అనే వ్యక్తి నుంచి లంచం తీసుకుంటున్న మహేశ్‌ను మే 21న అనిద అధికారులు అదుపులోకి తీసుకుని విచారించారు. జిల్లాధికారి సూచనలతోనే తాను నగదు తీసుకున్నానని ఉప తహసీˆల్దారు చెప్పడంతో మంజునాథ్‌ను అనిద అధికారులు రెండుసార్లు ప్రశ్నించారు. మంజునాథ్‌ను సోమవారం సాయంత్రం అరెస్టు చేశామని అనిద అధికారులు ప్రకటించారు. ఎస్సై పోస్టుల భర్తీకి నిర్వహించిన పరీక్షల ప్రశ్న పత్రం కేసులో ఏడీజీపీ అమృత్‌పాల్‌ కూడా సోమవారమే అరెస్టయిన కొంత సమయానికే ఐఏఎస్‌ అధికారి ఒకరు అరెస్టు కావడం కర్ణాటకలో సంచలనానికి కారణమైంది.