గవర్నరు కార్యదర్శి పేరిట మోసం

బెంగళూరు(యశ్వంతపుర),న్యూస్‌టుడే: గవర్నరు పేరుతో ప్రజలను మోసగిస్తున్నాడనే ఆరోపణపై బళ్లారి నివాసి సదరుల్లాఖాన్‌ను సీసీబీ పోలీసులు అరెస్టు చేశారు. గవర్నరు థావర్‌ చంద్‌ గహ్లోత్‌ వ్యక్తిగత కార్యదర్శిగా పరిచయం చేసుకుని వివిధ విశ్వవిద్యాలయాల్లో సిండికేట్‌ సభ్యులుగా నియమిస్తానని చెప్పి నిందితుడు కొందరి వద్ద నగదు తీసుకుని మోసగిస్తున్నట్లు పోలీసులు తెలిపారు. శ్రీమంతులు, పలుకుబడి కలిగిన వ్యక్తులకు నిందితుడు ఫోన్‌ చేసి సిండికేట్‌ సభ్యుడిగా చేస్తామని నమ్మించి నగదు తీసుకుని మోసగిస్తున్నాడు. రాజ్‌భవన్‌ నుంచి తనకు ఫోన్‌ వచ్చిందని మరికొందరిని నమ్మించి మోసగిస్తున్నట్లు విచారణలో వెల్లడైనట్లు పోలీసులు తెలిపారు. కేసు నమోదు చేసుకున్న పోలీసులు విచారణ చేపట్టారు.