హులిహైదరలో ఇరువర్గాల ఘర్షణ

ఇద్దరు మృతి..పరిస్థితి ఉద్రిక్తం

ఆసుపత్రిలో చికిత్స పొందుతున్న బాధితుడు

గంగావతి: కొప్పళ జిల్లా కనకగిరి తాలూకా హులిహైదరలో గురువారం ఇరువర్గాల మధ్య జరిగిన మూకుమ్మడి ఘర్షణలో ఇద్దరు మృతి చెందగా మరో వ్యక్తి తీవ్రంగా గాయపడి చావుబతుకుల మధ్య కొట్టుమిట్టాడుతున్నారు. మతాంతర వివాహం ఈ ఘర్షణలకు దారితీసినట్లు తెలిసింది. పాషావలి అనే యువకుడు కొన్ని రోజుల కిందట ఓ యువతిని మతాంతర వివాహం చేసుకున్నాడు. గురువారం ఉదయం అతడు పువ్వులు తెచ్చేందుకు యువతి గతంలో నివసించే వీధికి వెళ్లాడు. ఆ సమయంలో యంకప్ప తళవార్‌ యువకుడిపై చేయిచేసుకున్నాడు. విషయం తెలిసి యువకుడి వర్గానికి చెందిన వారు దాడి చేశారు. యంకప్ప తళవార్‌(44) ఈ దాడిలో మృతి చెందారు. మరో యువకుడు ధర్మణ్ణ తీవ్రంగా గాయపడ్డారు. అనంతరం యువతి వర్గానికి చెందిన వారు దాడులు చేశారు. ఈ సంఘటనలో పాషావలి (22) మృతి చెందారు. ఈ రెండు హత్యలతో హులిహైదరలో ఉద్రిక్త పరిస్థితులు నెలకొన్నాయి. ఎస్పీ అరుణాంగ్షు గిరి, గంగావతి డీవైఎస్పీ రుద్రేశ్‌ ఉజ్జిన కొప్ప సంఘటనా స్థలానికి వెళ్లి పరిశీలించారు. గ్రామంలో పోలీసులను మోహరింపజేసి నిషేధాజ్ఞలు జారీ చేశారు. కనకగిరి పోలీస్‌స్టేషన్‌లో కేసు నమోదైంది.