వణికిస్తున్న చలిపులి

బెంగళూరు (గ్రామీణం), న్యూస్‌టుడే : గతవారం వరకు వణుకు పుట్టించిన వర్షాలు కాస్త తగ్గుముఖం పట్టినా.. నదుల్లో వరద తీవ్రత తగ్గనేలేదు. పలు ప్రాంతాల్లో చలి పెరిగింది. కొన్ని చోట్ల వరద ప్రవాహం కొనసాగుతోంది. బెళగావి, హాసన, శివమొగ్గ, చిక్కమగళూరు తదితర ప్రాంతాల్లో మరికొన్నాళ్లు వర్షాలు కురుస్తాయని వాతావరణ శాఖ అధికారులు తెలిపారు. మహారాష్ట్ర జలాశయాల నుంచి వస్తున్న వరదతో ఘటప్రభ నదిలో ప్రవాహం ఎక్కువైంది. అన్ని జలాశయాల్లో నీరు నిండుగా ఉండడం, కాలువలకు నీటిని వదలడంతో సేద్యం పనులు జోరుగా మొదలయ్యాయి. ఇప్పటికే పంట నష్టపోయిన రైతులు మళ్లీ సేద్యం చేసుకునేందుకు అనుగుణంగా పొలాలను శుభ్రం చేసుకోవడం కనిపించింది. వర్షాలకు కొట్టుకుపోయిన రహదారుల పనులను ప్రజాపనుల శాఖ వేగవంతం చేసింది. బెళగావి, బాగల్‌కోటె జిల్లాల పరిధిలో ఘటప్రభ నది భయంగొలిపేలా ప్రవహిస్తోంది.