రైలు ఢీకొని ఇద్దరు దుర్మరణం

బళ్లారి, న్యూస్‌టుడే: రైల్వే ట్రాక్‌పైకి బహిర్భూమికి వెళ్లిన ఇద్దరు మహిళలు మృతిచెందిన ఘటన ఆదివారం సాయంత్రం బళ్లారి తాలూకాలో జరిగింది. మృతిచెందిన వారిని స్వాతి(21), పవిత్ర(16)లుగా గుర్తించారు. తాలూకా పి.డి.హళ్లి పిర్కాలోని తగ్గినబూదిహళ్‌ గ్రామానికి చెందిన స్వాతి, పవిత్ర గ్రామం సమీపంలోని రైల్వే ట్రాక్‌పై బహిర్భూమికి వెళ్లారు. రైల్వే ట్రాక్‌పై ఉన్న సమయంలో రెండు వైపుల నుంచి రైళ్ల్లు రావడంతో తప్పించుకోవడానికి ఇబ్బందిగా మారింది. దీంతో ఇద్దరు రైలుకింద పడి అక్కడికక్కడే మృతిచెందారు. ఈ విషయం తెలుసుకున్న పి.డి.హళ్లి ఎస్‌.ఐ.శశిధర్‌ సిబ్బంది ఘటనా స్థలానికి చేరుకొని మృతదేహాలను పరిశీలించారు. రైల్వే పోలీస్‌స్టేషన్‌ పరిధి కావడంతో పోలీసులతో చర్చించి రైల్వే పోలీసులకు సమాచారం అందించారు. మృతదేహాలను విమ్స్‌కు తరలించారు. కుటుంబసభ్యులు ఇచ్చిన ఫిర్యాదు మేరకు బళ్లారి రైల్వే పోలీసులు కేసు నమోదు చేసుకున్నారు.