పిడుగుపాటుకు నలుగురి మృతి

యాదగిరి, న్యూస్‌టుడే : పిడుగుపాటుకు తల్లి, ఇద్దరు పిల్లలు మరణించిన ఘటన యాదగిరి గ్రామీణ విభాగం ఎస్‌.హొసహళ్లిలో బుధవారం మధ్యాహ్నం సంభవించింది. మోనమ్మ (35), భాను (4), శ్రీనివాస (2)లను మృతులుగా గుర్తించారు. పొలంలో పని చేస్తున్న సమయంలో వర్షం రావడంతో తన పిల్లలను తీసుకుని చెట్టుకిందకు వెళ్లింది. అదే సమయంలో పిడుగుపడడంతో గాజరకోటకు చెందిన వీరు ముగ్గురూ అక్కడికక్కడే చనిపోయారు. ఇక్కడికి సమీపంలో మరో పొలంలో పని చేసుకుంటున్న సాబణ్ణ (18)పై పిడుగు పడడంతో అతనూ అక్కడికక్కడే మరణించాడు. యాదగిరి గ్రామీణ పోలీసులు దర్యాప్తు చేపట్టారు.