నూతన ఎస్పీగా రంజిత్‌కుమార్‌ బండారు

బదిలీ అయిన ఎస్పీ సైదులు అడావత్‌

బళ్లారి, న్యూస్‌టుడే: బళ్లారి జిల్లా పోలీస్‌ అధికారి సైదులు అడావత్‌ బెంగళూరుకు బదిలీ అయ్యారు. నూతన పోలీస్‌ అధికారిగా రంజిత్‌కుమార్‌ బండారును నియమిస్తూ ప్రభుత్వం ఆదేశాలు జారీ చేసింది. ఉమ్మడి బళ్లారి జిల్లా పోలీస్‌ అధికారిగా సైదులు అడావత్‌ 2020 సెప్టెంబరు 2వ తేదీ బాధ్యతలు తీసుకున్నారు. రెండు సంవత్సరాలు 32రోజులు పాటు విధులు నిర్వహించారు. శాంతిభద్రతలు, మట్కా, క్లబ్‌లు, అక్రమంగా బియ్యం తరలించడం అడ్డుకోవడం విఫలం చెందినట్లు పలు ఆరోపణలు వచ్చాయి. ఐదు రోజుల కిందట బళ్లారిలో బియ్యం వ్యాపారి హత్యకు గురయ్యారు. ఈనేపథ్యంలో ఎస్పీ సైదులు అడావత్‌ను బెంగళూరు సెంటర్‌ ఫర్‌ కౌంటర్‌ టెర్రిరిజం ఇంటర్నల్‌ సెక్యూరిటీ విభాగానికి బదిలీ చేశారు. అదే స్థానంలో విధులు నిర్వర్తిస్తున్న రంజిత్‌కుమార్‌ బండారును బళ్లారి ఎస్పీగా నియమిస్తూ ప్రభుత్వం ఉత్తర్వులు వెలువరించింది. రెండు రోజుల్లో ఎస్పీగా రంజిత్‌కుమార్‌ బండారు బాధ్యతలు స్వీకరించనున్నారు.
నూతన ఎస్పీ రంజిత్‌ కుమార్‌ బండారు