నూతన ఎస్పీ బాధ్యతల స్వీకరణ

సైదులు అడావత్‌ నుంచి బాధ్యతలు స్వీకరిస్తున్న రంజిత్‌కుమార్‌ బండారు

బళ్లారి, న్యూస్‌టుడే: జిల్లా నూతన పోలీస్‌ అధికారిగా రంజిత్‌కుమార్‌ బండారు మంగళవారం బదిలీ అయిన ఎస్పీ సైదులు అడావత్‌ నుంచి బాధ్యతలు స్వీకరించారు. కొత్త ఎస్పీని నియమిస్తూ ప్రభుత్వం ఆదేశాలను విడుదల చేసిన విషయం తెలిసిందే. ఆయన మంగళవారం ఉదయం బెంగళూరు నుంచి బళ్లారికి చేరుకున్నారు. తొలుత దుర్గమ్మను దర్శనం చేసుకొని ఎస్పీ కార్యాలయానికి చేరుకొని బాధ్యతలు స్వీకరించారు. రంజిత్‌కుమార్‌ బండారు తెలంగాణ రాష్ట్రం వరంగల్లు జిల్లాకు చెందిన వారు. అక్కడే ప్రాథమిక విద్య పూర్తి చేసి, 2008లో కాకతీయ విశ్వవిద్యాలయంలో ఇంజినీరింగ్‌ పూర్తి చేశారు. అనంతరం ఇన్ఫోసిస్‌లో సాఫ్ట్‌వేర్‌ ఉద్యోగంలో చేరారు. నాలుగేళ్ల పాటు ఉద్యోగం చేశారు. ప్రారంభం నుంచి సివిల్‌ సర్వీసులో చేరాలని పట్టుదలగా ఉండేది. 2013 మొదటి సారి సివిల్స్‌ పరీక్షలు రాశారు. అనంతరం 2014లో సివిల్స్‌ శిక్షణ కోసం దిల్లీకి వెళ్లారు. 2017లో సివిల్స్‌లో అఖిల భారత స్థాయిలో 555వ ర్యాంకు సాధించారు. కర్ణాటక ఐపీఎస్‌ కేటగిరిలో చేరారు. రాష్ట్రంలో పలు జిల్లాలో శిక్షణ పూర్తి చేశారు. మంగళూరు జిల్లా ఏసీపీగా విధులు నిర్వర్తించారు. అక్కడి నుంచి బెంగళూరు సెంటర్‌ ఫర్‌ కౌంటర్‌ టెర్రిరిజం ఇంటర్నల్‌ సెక్యూరిటీ విభాగంలో ఏసీపీగా పనిచేశారు. ప్రభుత్వం ఆయనను పదోన్నతిపై బళ్లారి ఎస్పీగా నియమించింది. ఈ సందర్భంగా ఏఎస్పీ నటరాజ్‌, నగర డీఎస్పీ శేఖరప్ప డీఎస్పీలు సత్యనారాయణరావు, కాశీగౌడ, మల్లేశ్‌ దొడ్డమని తదితర పోలీస్‌ అధికారులు కొత్త ఎస్పీకి ఘన స్వాగతం పలికారు.