సిద్ధరామయ్య బదులివ్వాలి

పత్రాలు చూపిస్తూ మాట్లాడుతున్న రమేశ్‌

బెంగళూరు (మల్లేశ్వరం), న్యూస్‌టుడే: తాను నిజాయతీపరుడినని ప్రతిసారీ గొప్పలు చెప్పుకొనే మాజీ ముఖ్యమంత్రి సిద్ధరామయ్య తన అధికారాన్ని అడ్డుపెట్టుకుని అక్రమాలకు పాల్పడ్డారని భాజపా దక్షిణ జిల్లా భాజపా అధ్యక్షుడు ఎన్‌.ఆర్‌.రమేశ్‌ ఆరోపించారు. తన శిష్యుని ద్వారా డీనోటిఫికేషన్‌ చేయించుకుని, అది తన తప్పుకాదన్నట్లు వ్యవహరిస్తున్నారని విమర్శించారు. బుధవారం ఇక్కడ నిర్వహించిన సమావేశంలో ఆయన విలేకరులతో మాట్లాడుతూ మైసూరు విజయనగరలో 1997లో 9,600 చ.అడుగుల విస్తీర్ణం ఉన్న భూమిని కేవలం రూ.6.72 లక్షలకు కొనుగోలు చేసిన విషయం నిజమా కాదా అని ప్రశ్నించారు. ఆ తర్వాత ఆరేళ్లకు ఆ భూమిని రూ.ఒక కోటికి విక్రయించే సమయంలో పలు నిబంధనలు ఉల్లంఘించారంటూ కొన్ని పత్రాలను ప్రదర్శించారు. ప్రభుత్వం స్వాధీనపరుచుకున్న భూమిని అప్పటి ముడా అధ్యక్షుడు సి.బసవేగౌడతో డీనోటిఫికేషన్‌ చేయించుకుని, విక్రయించారని ఆరోపించారు. తన ప్రశ్నలకు బదులిచ్చిన తర్వాతే, ఇతరులపై ఆరోపణలు చేయాలని పేర్కొన్నారు.