వినువీధుల్లో తేజస్‌ మెరుపు!

ఈసారి పెవిలియన్‌లో ఇదే ఆకర్షణ

దేశీయ విమానాల విన్యాసాలు

బెంగళూరు (శివాజీనగర), న్యూస్‌టుడే : ఏరో ఇండియా-2023లో భారతీయ పెవిలియన్‌లో ప్రత్యేక ఆకర్షణగా తేలికపాటి యుద్ధ విమానం తేజస్‌ను ప్రదర్శించనున్నారు. విమానంతో పాటు సిమ్యులేటర్లు, విమానానికి సంబంధించిన వివిధ విభాగాల నమూనాలను ప్రదర్శనకు ఉంచుతామని రక్షణ శాఖ అధికారులు తెలిపారు. ఒకే ఇంజిన్‌, డెల్టా వింగ్‌తో, తక్కువ బరువు, ఎక్కువ వేగంతో ప్రయాణించే సూపర్‌ సోనిక్‌ యుద్ధ విమానం భారతదేశ రక్షణ శాఖ అమ్ములపొదిలో శక్తివంతమైన వాహనమని అధికారులు పేర్కొన్నారు. ‘ఏ రన్‌వే టూ బిలియన్‌ ఆపర్చ్యునిటీస్‌’ పేరిట నిర్వహిస్తున్న 14వ ఎడిషన్‌ ఏరో ఇండియా-2023 ప్రదర్శన ఫిబ్రవరి 13 నుంచి 17 వరకు కొనసాగనుంది. ఏరో డిస్‌ప్లే విభాగంలో విమానాలు, వాటి ప్రదర్శనలను వీక్షించేందుకు సాధారణ పౌరులు ఆన్‌లైన్‌లో రూ.1000 చెల్లించి టిక్కెట్టు కొనుగోలు చేసుకోవచ్చు.