మంత్రి పదవి నాకేల?

ఈశ్వరప్ప వైరాగ్యపథం

ఈశ్వరప్ప

బెంగళూరు (మల్లేశ్వరం), న్యూస్‌టుడే : ఇక నాకు మంత్రి పదవి అవసరం లేదని ముఖ్యమంత్రి బసవరాజ బొమ్మైకి చెప్పానని మాజీ మంత్రి కేఎస్‌ ఈశ్వరప్ప వైరాగ్య ప్రకటన చేశారు. ఆయన శుక్రవారం ఇక్కడ విలేకరులతో మాట్లాడుతూ మంత్రివర్గ విస్తరణ చేపడితే.. నాకు మంత్రిగా అవకాశం ఇవ్వవద్దని సీఎంకు స్పష్టం చేశానన్నారు. విస్తరణ ఎందుకు జాప్యం జరుగుతుందో తనకు అర్థం కాలేదన్నారు. విస్తరణ చేపట్టినా కేవలం రెండు నెలలు మాత్రమే మంత్రిగా ఉండేందుకు అవకాశం దక్కుతుందని విచారం వ్యక్తం చేశారు. తనపై ఆరోపణలు వచ్చిన వెంటనే దర్యాప్తునకు అడ్డు కాకూడదని తక్షణమే మంత్రి పదవికి రాజీనామా చేశానని, నిరపరాధిగా న్యాయస్థానం గుర్తించిన తర్వాత మంత్రిగా అవకాశం ఇవ్వాలని కోరానని గుర్తు చేశారు. పీసీసీ అధ్యక్షుడు తీహార్‌ జైలుకు వెళ్లి వచ్చారని, ఆయన తనపై ఆరోపణలు చేయడం హాస్యాస్పదమని వ్యాఖ్యానించారు.