ట్రాఫిక్‌లో అంబులెన్స్‌.. ఊపిరొదిలిన చిన్నారి

బెంగళూరు (యశ్వంతపుర), న్యూస్‌టుడే : చికిత్స కోసం హాసన నుంచి నగరానికి అంబులెన్స్‌లో ఓ చిన్నారిని తరలించేవేళ విషాదం చోటుచేసుకుంది. నగర శివార్ల నుంచి గంటల తరబడి ట్రాఫిక్‌ రద్దీలో ఆ వాహనం చిక్కుకుపోయింది. చివరికి ఆస్పత్రికి చేరేలోగా చిన్నారి కన్నుమూసిన ఘటన శుక్రవారం ఇక్కడ గూరగుంటపాళ్య వద్ద చోటుచేసుకుంది. హసన నుంచి ఉదయం ఆరు గంటలకు బయలుదేరిన అంబులెన్స్‌ గంటలోపే నగర శివారు నెలమంగలకు చేరుకుంది. ఇక అర్ధగంటలో ఇక్కడి ఓ ప్రముఖ ఆసుపత్రికి చేరాలనేది లక్ష్యం. అక్కడి నుంచి ట్రాఫిక్‌ ఇక్కట్లు మొదలయ్యాయి. గూరగుంటపాళ్య కూడలిలో 20 నిమిషాలపాటు రద్దీలో ఆ వాహనం ఆగిపోయిన సమయంలో పసిబిడ్డ (2) కన్నుమూసింది. కుటుంబ సభ్యులు దు:ఖసాగరంలో మునిగిపోయారు. మృతదేహాన్ని అదే అంబులెన్స్‌లో తిరిగి హసనకు తరలించారు.