సౌదీలో ముగ్గురు కన్నడిగుల మృతి

మంగళూరు, న్యూస్‌టుడే : సౌదీ అరేబియా రియాద్‌లో జరిగిన రోడ్డు ప్రమాదంలో దక్షిణ కన్నడ జిల్లాకు చెందిన ముగ్గురు మరణించారు. హళెయంగడికి చెందిన రిజ్వాన్‌, సూరత్కల్‌కు చెందిన అకీల్‌, మంగళూరు నివాసి నాసిర్‌లను మృతులుగా గుర్తించారు. నాలుగు నెలల కిందటే వీరు ఉపాధి కోసం సౌదీకి వెళ్లారు. రోడ్డుకు అడ్డుగా వచ్చిన ఒంటెను వీరి వాహనం ఢీకొనడంతో ప్రమాదం జరిగింది. మృతదేహాలను భారత్‌కు తీసుకు వచ్చేందుకు దక్షిణ కన్నడ జిల్లా యంత్రాంగం చర్యలు చేపట్టింది.

ప్రేమ పేరిట అత్యాచారం

మైసూరు, న్యూస్‌టుడే : ప్రేమించి.. వివాహం చేసుకుంటానని నమ్మించిన మనోజ్‌ అనే యువకుడు తనపై అత్యాచారానికి పాల్పడ్డాడని ఒక యువతి (23) లక్ష్మీపురం ఠాణాలో ఫిర్యాదు చేశారు. తనను హత్య చేసేందుకు మనోజ్‌ ప్రయత్నించాడని పోలీసులకు ఇచ్చిన ఫిర్యాదులో ఆమె వాపోయారు. బాధితురాలి ఫిర్యాదును పరిగణనలోకి తీసుకుని, రెండు వారాలు గాలించి శనివారం నిందితుడిని అరెస్టు చేశారు. నిందితుడి నుంచి మరిన్ని వివరాలు రాబట్టేందుకు విచారణ చేపట్టారు.