ఈ సినిమాకు ఇంతటితో తెర

వెనక్కి తగ్గిన మునిరత్న

మఠాధిపతి డాక్టర్‌ నిర్మలానందనాథ్‌ స్వామితో చర్చిస్తున్న మునిరత్న

బెంగళూరు (యశ్వంతపుర), న్యూస్‌టుడే : రాష్ట్ర రాజకీయాల్లో తీవ్రవివాదానికి కారణమవుతున్న ‘ఉరిగౌడ- నంజేగౌడ’పై సినిమా చిత్రీకరణ విరిమించుకుంటున్నట్లు రాష్ట్ర ఉద్యాన వనాల శాఖ మంత్రి మునిరత్న వెల్లడించారు. ఆయన సోమవారం ఇక్కడ ఆదిచుంచనగిరి మఠాధిపతి డాక్టర్‌ నిర్మూలానందనాథ స్వామితో సమావేశమయ్యారు. మఠాధిపతితో కలిసిన మాట్లాడిన తరువాత.. ‘ఆ సినిమా తీయడం లేదు’ అని ప్రకటించారు. ‘ఉరిగౌడ- నంజేగౌడ’ సినిమా కోసం దాఖలాలు అందుబాటులోకి వస్తున్నా.. ఎవరి మనస్సూ నొప్పించ దలచుకోలేదన్నారు. ‘ఈ సినిమాను ఇంతటితో ముగిస్తున్నా’ అని తేల్చిచెప్పారు. చిత్రీకరణ ఏమంత కష్టం కాదని, దాన్ని తెరకెక్కించి ఓ వర్గాన్ని నొప్పించే పని ఎందుకనే ఈ నిర్ణయం తీసుకున్నానని వివరించారు. ‘ఉరిగౌడ- నంజేగౌడ’ సినిమా ఆలోచన విరమించుకోవాలని స్వామీజీ సూచించారని తెలిపారు. నిజానికి వారి చరిత్రపై పరిశోధనలు కొనసాగుతున్నాయని, కల్పిత కథల ఆధారంగా సినిమా తీయడం సాధ్యం కాదన్నారు. ‘నేను 25 సంవత్సరాలుగా సినీరంగంలో ఉన్నా. చివరి చిత్రం కురుక్షేత్రం’ అంటూ గుర్తుచేశారు.