వేతనాలు విడుదల చేయాలని ధర్నా

డీసీ కార్యాలయం ఎదుట నిరసన తెలియజేస్తున్న ఆందోళనకారులు

బళ్లారి, న్యూస్‌టుడే: సమాజ కల్యాణశాఖ ఆధీనంలో ఉన్న వసతి గృహాల్లో విధులు నిర్వహిస్తున్న తాత్కాలిక కార్మికులకు పెండింగ్‌లో ఉన్న వేతనాలు తక్షణమే విడుదల చేయాలని కోరుతూ కర్ణాటక రాష్ట్ర సంయుక్త వసతి నిలయాల కార్మికుల సంఘం (ఏఐయూటీయూసీ) ఆధ్వర్యంలో మంగళవారం జిల్లా పాలనాధికారి కార్యాలయం ఎదుట నిరసన వ్యక్తం చేశారు. అనంతరం డిమాండ్లతో కూడిన వినతిపత్రాన్ని డీసీ కార్యాలయం అధికారికి అందజేశారు. పెండింగ్‌లో ఉన్న వేతనాలతో పాటు, మౌలిక సౌకర్యాలు కోసం కార్మికులు పలుమార్లు అందోళన చేసి మంత్రి, అధికారుల దృష్టికి తీసుకెళ్లినా ప్రయోజనం లేదని ఆరోపించారు. వేతనాలు నెలనెలా సక్రమంగా ఇవ్వకపోవడంతో కార్మికుల కుటుంబ పోషణ కష్టంగా మారిందన్నారు. ఏఐయూటీయూసీ జిల్లా అధ్యక్షుడు డా.ప్రమోద్‌, కార్యదర్శి సురేష్‌, తదితరులు పాల్గొన్నారు.