పది పరీక్షలకు సర్వం సిద్ధం

బెంగళూరులోని ఓ పాఠశాలలో ఏర్పాట్లు ఇలా

బెంగళూరు (మల్లేశ్వరం), న్యూస్‌టుడే : విద్యార్థి జీవితంలో ప్రముఖ ఘట్టంగా చెప్పే పదో తరగతి పరీక్షలు శుక్రవారం నుంచి రాష్ట్ర వ్యాప్తంగా ప్రారంభం కానున్నాయి. పరీక్షలకు 5833 ప్రభుత్వ పాఠశాలలు, 3605 ప్రభుత్వం నుంచి నిధులు అందుకుంటున్న, 6060 ప్రైవేటు ప్రాఠశాలలకు చెందిన 8.42 లక్షల మంది విద్యార్థులు పరీక్షలు రాయనున్నారు. ఇందులో 3.60 లక్షల మంది ప్రభుత్వ పాఠశాలల విద్యార్థులే ఉన్నారు. పరీక్షల కోసం 3305 కేంద్రాలను సిద్ధం చేశారు. శుక్రవారం ప్రథమ భాష కన్నడ, హిందీ, తెలుగు, మరాఠీ, ఉర్దూ, సంస్కృతం, ఆంగ్లంఉన్న విద్యార్థులు ఉదయం 10.30 నుంచి మధ్యాహ్నం 1.45 వరకు పరీక్ష రాస్తారని కర్ణాటక పాఠశాలల పరీక్ష మండలి ప్రకటించింది. జిల్లా, తాలూకా కేంద్రాలలోని ఖజానాకు ప్రశ్న పత్రాలను పంపించారు. పరీక్ష సమయానికి గంట ముందుగా ఆయా కేంద్రాలకు వాటిని తరలించేందుకు ఏర్పాటు చేశారు. ఏప్రిల్‌ 15 వరకు పరీక్షలు కొనసాగనున్నాయి. ఏప్రిల్‌ 3న గణితం, ఏప్రిల్‌ 6న ద్వితీయ భాష, ఏప్రిల్‌ 10న సైన్సు, ఏప్రిల్‌ 12న తృతీయ భాష, ఏప్రిల్‌ 15న సోషల్‌ స్టడీస్‌ పరీక్షలుంటాయి. పరీక్షలకు హాజరయ్యే విద్యార్థులు, పరీక్ష ఉన్న రోజులలో తమ హాల్‌టిక్కెట్లను చూపించి, బీఎంటీసీ, ఆర్టీసీ బస్సు సేవలను ఉచితంగా వినియోగించుకోవచ్చని అధికారులు తెలిపారు.