‘ప్రజాస్వామ్యానికి పెనుముప్పు’

ప్రసంగిస్తున్న ఎం.ఎ.బేబి.. వేదికపై నాయకులు బీవీరాఘవులు, బసవరాజు తదితరులు

బెంగళూరు (యశ్వంతపుర), న్యూస్‌టుడే : ప్రజాస్వామ్య వ్యవస్థను నాశనం చేస్తున్న మతతత్వ శక్తులకు ఓటు ద్వారా తగిన గుణపాఠం చెప్పి తీరాలని సీపీఎం నేతలు రాష్ట్ర ప్రజలకు పిలుపు నిచ్చారు. బాగేపల్లి విధానసభ నియోజకవర్గంలో ఆ పార్టీ రాజకీయ సమావేశాన్ని ఏర్పాటు చేశారు. పార్టీ అభ్యర్థి డాక్టర్‌ అనిల్‌కుమార్‌ను గెలిపించాలని విజ్ఞప్తి చేశారు. సీపీఎం పాలిట్‌ బ్యూరో సభ్యులు ఎం.ఎ.బేబి, బీవీ రాఘవులు తదితరులు ప్రసంగించారు. దేశంలో ప్రజాస్వామ్య వ్యవస్థకు ముప్పు ఏర్పడిందని ఆందోళన వ్యక్తం చేశారు. దేశ సంపదను వ్యాపారవేత్త అదానీకి గుట్టు చప్పుడు కాకుండా కట్టపెడుతున్నారని, అదానీతో ప్రధానమంత్రి నరేంద్రమోదీకి ఉన్న సంబంధాలను నిలదీసిన కాంగ్రెస్‌ నేత రాహుల్‌గాంధీ గొంతు నొక్కి లోక్‌సభ నుంచి బయటకు పంపించారని ఆరోపించారు. విధానసభలో పీడిత ప్రజల గొంతు వినిపించేందుకు డాక్టర్‌ అనిల్‌కుమార్‌ను గెలిపించాలని విజ్ఞప్తి చేశారు. కార్యక్రమంలో సీపీఎం రాష్ట్ర కార్యదర్శి యు.బసవరాజు, కార్యదర్శి మండలి సభ్యులు కె.ప్రకాశ్‌, ఎం.పి.మునివెంకటప్ప తదితరులు పాల్గొన్నారు. బహిరంగ సభకు ముందు పుచ్చపల్లి సుందరయ్య భవన్‌ నుంచి కార్యకర్తలు ర్యాలీ నిర్వహించారు.