న్యాయంచేయాలంటూ.. వివాహిత దీక్ష

చర్చి ఎదుట ఆందోళన చేపట్టిన మహిళ

బూర్గంపాడు, న్యూస్‌టుడే: ముందే వివాహమైన విషయం చెప్పకుండా మోసం చేసి తనను పెళ్లి చేసుకున్నాడని.. న్యాయం చేస్తానని హామీ ఇచ్చి మొహం చాటేశాడని ఓ మహిళ కుమారుడితో కలిసి ఆందోళన చేపట్టింది. ఈ ఘటన సారపాకలో మంగళవారం చోటుచేసుకుంది. బాధితురాలి కథనం ప్రకారం.. ఏపీలోని తూర్పుగోదావరి జిల్లా మారేడుమిల్లి ప్రాంతానికి చెందిన సువర్ణరాజు కొన్నేళ్లుగా సారపాకలోని ఓ చర్చిలో పాస్టర్‌గా పని చేస్తున్నాడు. చర్చి ఆవరణలో నివాసం ఉంటున్నాడు. పాతసారపాకకు చెందిన సులోచన అదే చర్చికి వెళ్తూ ఉండేది. ఈ క్రమంలో ఆమెను ఆమె తల్లిదండ్రుల సమక్షంలో 2008లో వివాహం చేసుకుని ఖమ్మంలో ఉంచాడు. వీరికి 2014లో ఓ బాబు జన్మించాడు. ఇటీవల మనస్పర్థలతో ఇద్దరూ విడిగా జీవించాలని నిర్ణయించుకున్నారు. పరిహారం చెల్లిస్తానని పెద్ద మనుషుల సమక్షంలో కాగితాలు రాసిచ్చిన సువర్ణరాజు కనిపించకుండా పోయాడని బాధితురాలు ఆరోపించారు. ముందే వివాహమై ఇద్దరు పిల్లలున్నా మోసం చేసి తనను రెండో వివాహం చేసుకున్నాడన్నారు. తనకు న్యాయం చేయాలని కోరుతూ ఆయన పని చేసిన చర్చి ఎదుట కుమారుడితో కలిసి మంగళవారం బైఠాయించింది. తెదేపా, టీఎన్‌టీయూసీ, కాంగ్రెస్‌ నాయకులు ఘటనా స్థలికి చేరుకుని అండగా ఉంటామని బాధితురాలికి హామీ ఇచ్చారు. దీనికి సంబంధించి ఎలాంటి ఫిర్యాదు అందలేదని పోలీసులు తెలిపారు.