ఆ బంధమే మృత్యు పాశం..!

టేకులపల్లి, న్యూస్‌టుడే: వరుసకు అన్నాచెల్లెల బంధం.. వావీవరుస మరిచారు.. ఏళ్లుగా సన్నిహితంగా మెలిగారు. చివరికి ఆ బంధమే ఆమె పాలిట మృత్యుపాశమైంది. టేకులపల్లి మండలం తావుర్యాతండాలో మంగళవారం ఓ మహిళ దారుణ హత్యకు గురైంది. టేకులపల్లి సీఐ బానోత్‌ రాజు కథనం ప్రకారం.. తావుర్యాతండాకు చెందిన భూక్య కృష్ణ, పద్మ(37)కు ఇరవై ఏళ్ల క్రితం వివాహమైంది. వీరికి ప్రస్తుతం ఇంటర్‌ పూర్తి చేసిన కుమార్తె, ఇంటర్‌ ప్రథమ సంవత్సరం చదువుతున్న కుమారుడున్నారు. ఏడేళ్ల క్రితం కృష్ణ మృతి చెందాడు. ఈ క్రమంలోనే అతని అక్క భర్త గుగులోత్‌ వెంకన్నతో పద్మ సన్నిహితంగా ఉంటోంది. వెంకన్న తన భార్యతో గొడవ పెట్టుకుని వచ్చి పద్మ, వారి పిల్లలతో కలిసి వారింట్లోనే ఏడేళ్లుగా ఉంటున్నాడు. ఈ నేపథ్యంలో పదిహేను రోజులుగా వెంకన్నతో సంబంధం వద్దంటూ పద్మను పిల్లలు వారిస్తున్నారు. ఇంకోపక్క వెంకన్న తన కుమారుడికి పద్మ కూతురునిచ్చి పెళ్లి చేయాలని ఒత్తిడి తెస్తున్నాడు. తన కూతురుని ఇచ్చి వివాహం చేసేదిలేదని, వేరుగా ఉందామని వెంకన్నకు దీంతో పద్మ తేల్చి చెప్పింది. ఈక్రమంలోనే మంగళవారం ఉదయం తండా సమీపంలోని మిరప తోటకు వెళ్లిన ఆమెను కత్తితో మెడ వెనుక భాగంలో కోసి హత్య చేశాడు. నిందితుడు పరారీలో ఉన్నాడు. టేకులపల్లి సీఐ రాజు పంచనామా నిర్వహించారు.