రేకుల ఇల్లుకు.. రూ.7 లక్షల బిల్లు!

 కొత్తగూడెం గ్రామీణం, న్యూస్‌టుడే: మూడు గదుల రేకుల ఇల్లు.. ఓ ఫ్యాన్‌, టీవీ, రెండు విద్యుత్తు బల్బులు... బిల్లు చూస్తే రూ.7,02,825! ఇదేమిటని అడిగితే సమాధానమివ్వని బిల్లు కలెక్టర్‌. ఇదీ.. లక్ష్మీదేవిపల్లి మండలం హమాలీకాలనీకి చెందిన మాడిశెట్టి సంపత్‌కు ఇటీవల ఎదురైన అనుభవం. ఆయన నివాసానికి సంబంధించి మీటరుకు మే నెలలో అక్షరాలా రూ.7.02 లక్షల బిల్లు రావడంతో అవాక్కయ్యాడు. ఏప్రిల్‌ వరకు నెలకు సగటున రూ.400 వరకు బిల్లు వచ్చేది. ఇదేంది సారూ.. ఎలా సరిదిద్దుతారు? అని అడిగేందుకు స్థానిక బిల్లు కలెక్టర్‌ను సంప్రదిస్తే సరైన సమాధానం ఇవ్వకుండా దాటేస్తున్నారని సంపత్‌ వాపోయారు. తప్పుల తడక బిల్లులతో హైరానా పెట్టడం సరికాదని.. అధికారులు బిల్లు సరిచేయాలని బాధిత వినియోగదారుడు కోరుతున్నాడు.