Khammam: వయసు 27.. వార్షిక వేతనం రూ.3.20 కోట్లు

ఇల్లెందు, న్యూస్‌టుడే: అతని వయస్సు 27 ఏళ్లు.. వార్షిక వేతనం రూ.3.20 కోట్లు.. ప్రముఖ గూగుల్‌ సంస్థలో ఉద్యోగం.. మన్యంలో పుట్టిన మాణిక్యం కొండా అఖిల్‌ ప్రతిభ ఇది. ఖమ్మం జిల్లా ఇల్లెందు మండలం సుభాష్‌నగర్‌ గ్రామానికి చెందిన కొండా నారాయణ, రాజేశ్వరి దంపతులకు ముగ్గురు కూతుళ్లు, ఒక కుమారుడు. నారాయణ ఆర్‌ఎంపీగా పనిచేస్తూ మెడికల్‌ దుకాణం నడిపేవారు. కుటుంబ పోషణకు తీవ్ర ఇబ్బందులు పడేవారు. మొదటి కుమార్తె ప్రగతి బీడీఎస్‌, రెండో కుమార్తె పవిత్ర ఎంఫార్మసీ, మూడో కుమార్తె ప్రశాంతిని సాఫ్ట్‌వేర్‌ చదివించి పెళ్లిళ్లు చేశారు. అఖిల్‌ను చదివించే క్రమంలో ఆర్థిక సమస్యలు మరింత పెరిగాయి. 1నుంచి 5వ తరగతి వరకు పలు ప్రైవేటు పాఠశాలల్లో చదివించాల్సి వచ్చింది. పాఠశాలలో ఫీజులు చెల్లించలేని పరిస్థితిలో ఓ డ్రిల్‌ మాస్టర్‌ సింగరేణి పాఠశాలలో చేర్పించేందుకు సహకరించాడు. తానే ఫీజు చెల్లించి నారాయణకు అండగా నిలిచాడు. 

గూగుల్‌లో ఉద్యోగం 

హైదరాబాద్‌లోని ఓ ప్రముఖ ప్రైవేటు విద్యాసంస్థ 7వ తరగతిలో చేరేందుకు ప్రవేశ పరీక్ష నిర్వహించింది. ఈ పరీక్షలో అఖిల్‌ ఉమ్మడి ఏపీలో ఆరో స్థానం సాధించాడు. దీంతో ఆ విద్యాసంస్థ అఖిల్‌కు 7వ తరగతి నుంచి ఇంటర్‌(ఎంపీసీ) పూర్తయ్యే వరకు ఉచితంగా అన్ని రకాల సౌకర్యాలు కల్పించింది. ఐఐటీ ప్రవేశ పరీక్షలో 1,200 ర్యాంకు రావడంతో ఖరగ్‌పూర్‌ ఐఐటీ కాలేజీలో సీటు లభించింది. అక్కడ కంప్యూటర్‌ సైన్స్‌ పూర్తి చేశాడు. అమెరికా వెళ్లి ఎంఎస్‌ చదవాలని నిర్ణయించుకున్నాడు. తండ్రి ఆర్థిక పరిస్థితి ఇబ్బందికరంగా ఉండటంతో తిరిగి ఇల్లెందుకు వచ్చి ఓ ప్రైవేటు సంస్థలో రెండేళ్లు చిన్నపాటి ఉద్యోగం చేశారు. తనలో ఉన్న కోరికను నెరవేర్చుకునేందుకు తండ్రి సహకారంతో హైదరాబాద్‌లోని ఓ ప్రైవేటు బ్యాంకులో విద్యా రుణం(ఎడ్యుకేషన్‌ లోన్‌) రూ.80 లక్షలు తీసుకున్నాడు. ఇతరుల వద్ద రూ.20 లక్షలు అప్పు తీసుకున్నారు. అనంతరం న్యూయార్క్‌ నగరంలోని  కొలొంబియా యూనివర్సిటీలో ఎంఎస్‌లో చేరాడు. 2022 మేలో చదువు పూర్తి చేశాడు. వార్షిక వేతనం రూ.3.2 కోట్లు ఇచ్చేందుకు గూగుల్‌ సంస్థ అఖిల్‌తో ఒప్పందం చేసుకుంది. 2022 జులై 11న అఖిల్‌ కాలిఫోర్నియాలోని గూగుల్‌ ప్రధాన సంస్థలో స్టేజ్‌-2 అధికారిగా చేరాడు.