ఆన్‌లైన్‌లో రాజ్యాంగ ఉపోద్ఘాతం’

ఖమ్మం కలెక్టరేట్‌, న్యూస్‌టుడే: భారత రాజ్యాంగం ఉపోద్ఘాతాన్ని ప్రజలు చదివేందుకు అనువుగా ఆన్‌లైన్‌లో అందుబాటులో ఉంచినట్లు అదనపు కలెక్టర్‌ మధుసూదన్‌ తెలిపారు. 73వ రాజ్యాంగ దినోత్సవాన్ని పురస్కరించుకుని కలెక్టరేట్‌లోని ప్రజ్ఞ సమావేశ మందిరంలో నిర్వహించిన కార్యక్రమంలో కలెక్టరేట్‌ ఉద్యోగులతో రాజ్యాంగ ప్రతిజ్ఞ చేయించారు. ఈ సందర్భంగా ఆయన మాట్లాడుతూ ఆంగ్లం సహా 22 భారతీయ అధికార భాషల్లో భారత రాజ్యాంగ ఉపోద్ఘాతాన్ని ఆన్‌లైన్‌లో http://eadpreamble.nic.in వెబ్‌సైట్‌లో ఉంచారని తెలిపారు. 1949 నవంబర్‌ 26న తుది రాజ్యాంగం ఆమోదించారని, 2015 సంవత్సరం నుంచి రాజ్యాంగ దినోత్సవం జరుపుకొంటున్నామని వివరించారు. రాజ్యాంగ స్ఫూర్తి సాధన దిశగా అడుగులు వేయాలని పిలుపునిచ్చారు. ఈ కార్యక్రమంలో ఏవో మదన్‌గోపాల్‌, కలెక్టరేట్‌ అధికారులు, ఉద్యోగులు పాల్గొన్నారు.