విద్యార్థులకు స్టడీ మెటీరియల్‌ అందజేత

ఖమ్మం సంక్షేమవిభాగం: జిల్లావ్యాప్తంగా ఉన్న ఎస్సీ వసతి గృహాల్లోని పదో తరగతి విద్యార్థులకు స్టడీ మెటీరియల్‌ను గురువారం అందించారు. ఈనెల 25వ తేదీన ఎస్సీ వసతి గృహాల్లోని పదో తరగతి విద్యార్థులకు ప్రేరణ తరగతులు నిర్వహించకపోవడం, స్టడీ మెటీరియల్‌ను అందించకపోవడంపై ‘ప్రేరణ కలిగించరా’ శీర్షికన ప్రచురితమైన కథనానికి అధికారులు స్పందించారు. ఖమ్మంలోని ఎస్సీ బాలికల వసతిగృహం(ఏ)లో విద్యార్థులకు స్టడీ మెటీరియల్‌ను ఎస్సీడీడీ కస్తాల సత్యనారాయణ, వసతిగృహ సంక్షేమాధికారి నెల్లూరి విజయ అందించారు. ఈ సందర్భంగా ఆయన మాట్లాడుతూ... జిల్లావ్యాప్తంగా ఉన్న 35 వసతి గృహాల్లోని 534 మంది విద్యార్థులకు మెటీరియల్‌ను అందిస్తున్నట్లు తెలిపారు. వచ్చే ఆదివారం ప్రేరణ కార్యక్రమాన్ని నిర్వహిస్తున్నామన్నారు. విద్యార్థులు వీటిని ఉపయోగించుకొని నూరుశాతం ఉత్తీర్ణత సాధించాలన్నారు. వసతిగృహ సిబ్బంది శారదాబాయి తదితరులు పాల్గొన్నారు.