సిలిండర్‌ పేలి కార్మికుడి దుర్మరణం

యైటింక్లైన్‌కాలనీ, న్యూస్‌టుడే: పెద్దపల్లి జిల్లా సింగరేణి ఆర్జీ-3 ఓసీపీ-2 సీహెచ్‌పీ (కోల్‌ హాండ్లింగ్‌ పాయింట్‌) వద్ద శనివారం ఉదయం ఫైర్‌ సిలిండర్‌ పేలిన ప్రమాదంలో వెల్డర్‌ ట్రైనీ బట్టి జైనథ్‌కుమార్‌ (28) దుర్మరణం చెందాడు. ఓసీపీ-1 సీహెచ్‌పీ వద్ద వెల్డింగ్‌ విధులు నిర్వహించే జైనథ్‌కుమార్‌ పని ముగించుకుని వెళ్తున్న సమయంలో ఆ ప్రాంతంలో ఉన్న ఫైర్‌ సిలిండర్‌ పేలి ఆయన మెడ భాగంలో తగలడంతో అక్కడే పడిపోయాడు. తోటి ఉద్యోగులు ఆస్పత్రికి తరలించగా, అప్పటికే మృతి చెందినట్లు వైద్యులు తెలిపారు. భద్రాద్రి కొత్తగూడెం జిల్లా రుద్రంపూర్‌కు చెందిన జైనథ్‌కుమార్‌కు భార్య, కుమారుడున్నారు.