విద్యుదాఘాతానికి గురై రైతు మృతి

బానోత్‌ లింగా

జూలూరుపాడు, న్యూస్‌టుడే: విద్యుదాఘాతానికి గురై తన పొలం వద్దనే ఓ రైతు మృత్యువాత పడిన సంఘటన జూలూరుపాడు మండలం కొమ్ముగూడెంలో శనివారం సాయంత్రం చోటుచేసుకుంది. గ్రామానికి చెందిన బానోత్‌ లింగా(70) వరి పొలంలోని మోటారు స్విచ్‌ ఆఫ్‌ చేసేందుకు వెళ్లారు. ఆ సమయంలో వర్షం కురుస్తుండటంతో విద్యుదాఘాతానికి గురై అక్కడికక్కడే మృతి చెందారు. లింగా ప్రతి రోజు నీటి తడులు కల్పించేందుకు మోటారును ఆన్‌ చేసి ఇంటికి వచ్చి సాయంత్రం వెళ్లి స్విచ్‌ను నిలిపివేస్తారు. ఈ క్రమంలోనే వర్షం కురుస్తున్న సమయంలో మోటారును బంద్‌ చేసేందుకు వెళ్లి తిరిగి రాలేదు. సమీపంలోని వారు గమనించి కుటుంబ సభ్యులకు సమాచారం అందించడంతో వెళ్లి పరిశీలించగా విగతజీవిగా పడిఉన్నారు. కుటుంబ సభ్యులు, బంధువులు కన్నీరుమున్నీరుగా విలపిస్తున్నారు.