ఆర్పీఎఫ్‌ కానిస్టేబుల్‌కు జీవనరక్ష పురస్కారం

కానిస్టేబుల్‌ శివాని

సికింద్రాబాద్‌, న్యూస్‌టుడే: రైల్వే ప్రయాణికురాలి ప్రాణాలను కాపాడడంలో కీలక భూమిక పోషించిన ఖమ్మం రైల్వేస్టేషన్‌ ఆర్పీఎఫ్‌ కానిస్టేబుల్‌ శివానికి జీవనరక్ష అవార్డును ప్రకటించారు. ఈ మేరకు ద.మ. రైల్వే ఆర్పీఎఫ్‌ సీనియర్‌ డివిజనల్‌ సెక్యూరిటీ కమిషనర్‌   దేబస్మిత సి బెనర్జీ గురువారం వెల్లడించారు. మే 31న ఖమ్మం రైల్వేస్టేషన్‌లో మధిరకు వెళ్లేందుకు కిక్కిరిసిపోయిన ఇంటర్‌సిటీ రైలు ఎక్కేందుకు ప్రయాణికురాలు కృష్ణవేణి ప్రయత్నిస్తుండగా, కాలు జారి ప్లాట్‌ఫాం, రైలు మెట్ల మధ్యలో ఇరుక్కుపోయింది. తక్షణమే స్పందించిన అధికారులు కొద్దిసేపు రైలును నిలిపివేశారు. కృష్ణవేణిని బయటకు లాగేందుకు రైల్వే పోలీసులు ప్రయత్నించారు. 100 మందికిపైగా ప్రయాణికులు, పోలీసులు బోగిని వెనక్కి నెడుతుంటే, ఆర్పీఎఫ్‌ కానిస్టేబుల్‌ శివాని చాకచక్యంగా క్షతగాత్రురాలిని బయటకు లాగారు. ఆమెను ఆసుపత్రికి తరలించేందుకు సకాలంలో అంబులెన్సు రాకపోతే శివానియే ఆసుపత్రికి తీసుకెళ్లడంలో చొరవచూపింది. ప్రయాణికురాలి ప్రాణాలను కాపాడడంలో శివాని చూపిన చొరవ అభినందనీయమని దేబస్మిత పేర్కొన్నారు. ఆమెను జీవనరక్ష పురస్కారంతో ప్రకటిస్తున్నట్లు వెల్లడించారు.