రూ.400 కోట్లు ఎలా మళ్లిస్తారు?

ఎన్టీఆర్‌ ఆరోగ్య విశ్వవిద్యాలయం, న్యూస్‌టుడే: నిబంధనలు తుంగలో తొక్కి ఎన్టీఆర్‌ ఆరోగ్య విశ్వవిద్యాలయానికి చెందిన రూ.400 కోట్లు ఎలా మళ్లిస్తారని ఎమ్మెల్సీ కె.ఎస్‌.లక్ష్మణరావు ప్రశ్నించారు. గత వారం రోజులుగా యూనివర్సిటీ నిధులపై ఆందోళన చేస్తున్న ఉద్యోగులకు సోమవారం ఆయన మద్దతు ప్రకటించారు. తొలుత భారత రాజ్యాంగ నిర్మాత బీఆర్‌ అంబేడ్కర్‌ వర్ధంతి సందర్భంగా నివాళులర్పించారు. అనంతరం లక్ష్మణరావు మాట్లాడుతూ రాష్ట్ర ఆర్థిక మంత్రి బుగ్గన రాజేంద్రనాథ్‌రెడ్డి అపాయింట్‌మెంట్‌ కోరామని, నిధుల విషయమై మాట్లాడతానన్నారు. తొలుత వీసీ శ్యాంప్రసాద్‌తో ఉద్యోగ ఐకాస నాయకులు, ఎమ్మెల్సీ చర్చించారు. ఉద్యోగుల భద్రత, విశ్వవిద్యాలయ నిర్వహణపై దృష్టి సారించి నిధులు వెంటనే వెనక్కి తీసుకోవాలని డిమాండ్‌ చేశారు. ఉద్యోగుల, కార్మికుల సంఘ నాయకులు కోటేశ్వరరావు, భానుప్రసాద్‌, ఎస్‌ఎఫ్‌ఐ అధ్యక్షుడు ప్రసన్న కుమార్‌, పీడీఎస్‌యూ రాష్ట్ర అధ్యక్షుడు రవిచంద్ర, ఐకాస నాయకులు అక్కిరాజు, నరసింహారావు, నారాయణ, వాసు, పోతురాజు పాల్గొన్నారు.