చంద్రశేఖరశాస్త్రి సేవలు చిరస్మరణీయం

సంతాప సభలో బాబాప్రసాదు, హిందూ ధర్మ పరిరక్షణ వేదిక సభ్యులు

మచిలీపట్నం(చిలకలపూడి),న్యూస్‌టుడే: చంద్రశేఖర శాస్త్రి సేవలు చిరస్మరణీయమని పలువురు వక్తలు పేర్కొన్నారు. నగరంలోని హిందూ ధర్మ పరిరక్షణ వేదిక కార్యాలయంలో ఆదివారం ప్రముఖ ప్రవచనకర్త మల్లాది చంద్రశేఖరశాస్త్రి సంతాపసభ నిర్వహించారు. ఈ సందర్భంగా మున్సిపల్‌ మాజీ ఛైర్మన్‌ ఎం.బాబాప్రసాదు మాట్లాడుతూ హిందూ ధర్మ పరిరక్షణకు మల్లాది చేసిన సేవలను కొనియాడారు. ధర్మ సందేహాలు తీర్చడంలో తన ప్రత్యేకతను చాటుకున్నారని అన్నారు. హిందూ ధర్మ పరిరక్షణ వేదిక అధ్యక్షుడు ఏఆర్‌కే మూర్తి మాట్లాడుతూ తెలుగునాట రామాయణం, భారతం, భాగవత ప్రవచనాలకు చంద్రశేఖరశాస్త్రి పెట్టింది పేరని అన్నారు. వేదిక సభ్యులు ఎం. సుబ్రహ్మణ్యం, ఎ. విశ్వేశ్వరశాస్త్రి, పీవీ ఫణికుమార్‌, ఎ.సుబ్రహ్మణ్యం, కె.రఘు, పి.పాండురంగచడగ, విజయనాథ్‌, ఎం.నరసింహారావు పాల్గొన్నారు.