ఉసురు తీసిన పతంగం సరదా

భవానీపురం, న్యూస్‌టుడే : గాలిపటం ఎగుర వేసేందుకు డాబా పైకి వెళ్లిన విద్యార్థి ప్రమాదవశాత్తు పడిపోయి మృతిచెందిన ఘటన విద్యాధరపురం చెరువు సెంటర్‌ సమీపంలో ఆదివారం జరిగింది. పోలీసుల వివరాల ప్రకారం.. కోలా వెంకటరమణమూర్తి ఆటో డ్రైవర్‌గా పని చేస్తున్నారు. ఆయనకు కుమారుడు ఫణీంద్ర, కుమార్తె ఉన్నారు. ఫణీంద్ర(16) స్థానికంగా ఉన్న పాఠశాలలో పదో తరగతి చదువుతున్నాడు. గాలిపటం ఎగురవేసేందుకు వారు అద్దెకు ఉంటున్న భవనం పైకి ఫణీంద్ర ఆదివారం సాయంత్రం 5:30 గంటల సమయంలో వెళ్లాడు. తర్వాత కుమారుడి గురించి తండ్రి ఆరా తీశాడు. గాలిపటం ఎగురవేసేందుకు డాబా పైకి వెళ్లినట్లు భార్య చెప్పింది. కొద్దిసేపటి తర్వాత కుమారుడిని పిలవగా పలకలేదు. అనుమానం వచ్చి పైకి వెళ్లి చూడగా చీకట్లో కింద పడిపోయి కనిపించాడు. కుమారుడి వద్దకు వెళ్లి చూడగా తలకు గాయంతో కనిపించాడు. వెంటనే సమీపంలోని ప్రైవేటు ఆసుపత్రికి తరలించారు. వైద్యులు పరీక్షించి చనిపోయినట్లు చెప్పారు. విద్యుత్తు తీగలకు ఇరుక్కున్న గాలిపటాన్ని తీసే క్రమంలో కింద పడిపోయి చనిపోయినట్లు పోలీసులు భావిస్తున్నారు. సోమవారం తండ్రి ఫిర్యాదు మేరకు కేసు నమోదు చేసినట్లు భవానీపురం పోలీసులు తెలిపారు.