ఈ రహదారిపై ప్రయాణం..ప్రమాదకరం

నందమూరు-మంగినపూడి బీచ్‌ రహదారి దుస్థితి

పెడన, న్యూస్‌టుడే: పెడన-బందరు మండలాలను అనుసంధానం చేసే రహదారి ఇది. పెడన మండలం నందమూరు నుంచి బందరు మండలం గోకవరం మీదుగా మంగినపూడి బీచ్‌ వరకు వెళ్లే 8.9 కిమీల ఈ బీటీ రోడ్డు కొన్నేళ్లుగా నిర్వహణకు నోచుకోవటంలేదు. ఫలితంగా అధ్వానంగా తయారై, ప్రయాణం ప్రమాదకరంగా మారింది. నందమూరు ఇంజినీరింగ్‌ కళాశాల సమీపంతో పాటు పలుచోట్ల రహదారికి సరిహద్దున కాలువ ఉండటంతో కోతకు గురవుతోంది. ఈ రహదారిపై ట్రాఫిక్‌ ఎక్కువగా ఉంటుంది. కళాశాల విద్యార్థులు వందల సంఖ్యలో రాకపోకలు సాగిస్తుంటారు. అలాగే ఆక్వా ఉత్పత్తులతో వెళ్లే వాహనాలు గణనీయంగా ఉంటాయి. మంగినపూడి బీచ్‌కు వెళ్లే పర్యాటకులు ఇటుగా రాకపోకలు సాగిస్తుంటారు. పంచాయతీరాజ్‌ ఆధీనంలోని ఈ రహదారి వెడల్పు 3.75 మీటర్లు కాగా ఇరువైపులా కోత కారణంగా వెడల్పు తగ్గిపోతోంది. రోడ్డు పునఃనిర్మాణానికి ప్రతిపాదనలు సిద్ధంచేస్తున్నామని, నిధులు మంజూరైన అనంతరం పనులు ప్రారంభిస్తామని పంచాయతీరాజ్‌ పెడన మండల ఏఈఈ ఎల్‌.హరిబాబు చెప్పారు.