రంగులద్దుకున్న పెనుమల్లి కేంద్రం

ముదినేపల్లి, న్యూస్‌టుడే: గ్రామాల్లో చెత్త సమస్య పరిష్కారానికి, చెత్త నుంచి సంపద సృష్టించి పంచాయతీలకు ఆదాయం సమకూర్చే సదాశయంతో మండలంలోని అన్ని గ్రామపంచాయతీల్లో చెత్తసంపద కేంద్రాలను నిర్మించారు. 2018లో మండలంలోని 32 పంచాయతీల్లో ఒక్కొక్కటి చొప్పున జాతీయ ఉపాధి హామీ పథకంలో సుమారు రూ.6లక్షల వ్యయంతో చెత్త నుంచి సంపద తయారీ కేంద్రాలను నిర్మించారు. అప్పటి నుంచి వాటిని వినియోగంలోకి తీసుకురాకపోవటంతో ముళ్లకంపలతో నిండిపోయాయి. చెత్తసంపద కేంద్రాలు ఉన్నా పంచాయతీ అధికారులు సేకరించిన చెత్తనంతా రహదారుల పక్కన, శ్మశానవాటికల్లో పోస్తూ వాటిని డంపింగ్‌ యార్డులుగా మార్చేస్తున్నారు. తాజాగా ఆ కేంద్రాలకు ఉపాధి హామీ పథకంలో భాగంగా రంగులు వేస్తున్నారు. గతంలో మాదిరి నిధులు వెచ్చించి రంగులు వేసి వదిలేయకుండా ఇప్పటికైనా వినియోగంలోకి తీసుకువస్తేనే ఫలితం ఉంటుందని ప్రజలు కోరుతున్నారు.